Kutoka kwa Kabidhi Wasii Mkuu

Napenda kuwakaribisha wananchi wote katika tovuti yetu ambayo imeboreshwa na kutengenezwa kwa umahiri mkubwa kwa lengo la kutoa taarifa mbalimbali kuhusu kazi na shughuli zinazotekelezwa  na Wakala wa Usajili Ufilisi na Udhamini(RITA) hususani katika juhudi za kusaidia utoaji haki kwa wananchi kupitia huduma tunazotoa.

Tovuti hii ni nyenzo ya kukupatia taarifa sahihi na za kina kuhusu aina ya huduma tunazotoa, upatiakanaji wake na gharama husika kwa pamoja ikiambatana na Sheria 9 zinazoongoza majukumu ya wakala.  Aidha, tovuti hii ina video, picha na machapisho  mbalimbali kwa ajili ya umma na hivyo kuifanya kuwa ni miongoni mwa sehemu muhimu za marejeo kuhusu shughuli mbalimbali zinazotekelezwa na Wakala.

Wakala unaendelea kuimarisha upatikanaji wa huduma zake kwa njia ya kidijitali ambapo kwa sasa wananchi wanatumia mfumo wa eRITA kutuma maombi ya huduma za Usajili wa Vizazi, Vifo, Ndoa na Talaka pamoja na Udhamini. Tovuti hii ni dirisha muhimu linalomuwezesha mwananchi kuingia katika mfumo wa eRITA.

Natoa wito kwa wadau wote kuendelea kutembelea mara kwa mara Tovuti yetu na kuwasihi kuwasiliana nasi kwa maoni, ushauri na ufafanuzi zaidi juu ya huduma zetu kupitia njia mbalimbali zilizoainishwa.

Tunaahidi kuendelea kutoa huduma bora na kushirikiana na wadau wote katika kuhakikisha wananchi wanapata huduma bora kwa wakati.

Bw. Frank K. Frank

Kabidhi Wasii Mkuu na Afisa Mtendaji Mkuu